BEHIND THE WALLS : كل عام والكل بألف خير

بما إنو رمضان ودعنا حبيت آخر post بلم فيه الأغراض وبسكر الخيمة الرمضانية يكون بيحكي عن العيد بس بطريقة مختلفة شوي.

الجمعة اللي فات كنت في الصالون وبما إني كتيرة حكي وغلبة وفضولية (بالذات في مواضيع الbusiness) فلازم أعرف عن ضغط الشغل عندهم في أواخر رمضان. طبعاً انصدمت لما البنت حكتلي إنهم بيفطرو في الصالون، (معلش ما تآخذوني بس أنا مش من زوار الصالونات فهادا هو سبب الصدمة عل ما أظن) وبيضلهم فيه للساعة 8:30 طبعاً هادا الحكي معناتو إنو في ضغط شغل مش عادي عندهم والحمد لله. بنت تانيه في صالون تاني حكتلي إنهم بيناموا في الصالون ليلة العيد لأنو بيجيهم زباين من الصبح بكير (عشان يملسو كششهم هي هي هي).

انزل عالسوق بتلاقي أزمة مش طبيعية، وين ما تمشي حدا بيخبط فيك (بس بيكون جاي عبالي أدق في حدا لأنو أكره ما علي حدا يخبط في وأنا خلقة ربي عصبية).

زبدة الموضوع إنو كل شي بيصير حوالينا بيثبت إنو ترتيب ربنا لرمضان، وللعيد اللي بيجي من بعديه وبيستلزم تحضيرات كتيرة، فيه وجهة نظر اقتصادية فيها حكمة مش بس بعيدة المدى بل وأبدية الفاعلية، هادا الترتيب اللي بيفيد في تحريك الاقتصاد ودورات الأعمال اللي بتكون مضطرة إنها تلبي الطلب الكبير على عدد متنوع من السلع والخدمات في فترة زمنية قصيرة، ومن الطبيعي مع زيادة الطلب إنو السعر يطلع والاقتصاد يزدهر؛ يعني بتنكسر حلقة الركود ولو لفترة قصيرة.

لكن للأسف بنتذكر إخواننا المسلمين في كل مكان المحرومين من الاستمتاع بمظاهر العيد، واللي الاقتصاد عندهم بيطلع من كساد عشان يدخل في كساد أشد قسوة.

الجمعة 20/10 بالتاريخ الميلادي صادفت الجمعة اليتيمة في رمضان والناس جاهدت و تعذبت كتير مشان تصلي في الأقصى (شفت صور ومشاهد كتير مؤثرة لناس تعرضت للضرب لأنها بتطالب بحقها المشروع)، الله يعينهم على صلاة العيد. لحد هلأ في فلسطين إضراب عشان الرواتب، الله يكون في عونهم ويفرج كربهم وكرب أهل العراق وكرب المسلمين كلهم في كل مكان.

إن شاء الله اللي ما كان عندو كسوة عيد أو عيدية لولادو يكون عندو السنة الجاية، وما ييجي العيد الجاي إلا وتكون راية الإسلام مرفوعة.

آسفة طولت عليكم بس الحكي معكم ما بينمل وكل عام وإنتوبألف خير وينعاد عالكل وبلاد المسلمين معززة مكرمة والمسلمين في كل مكان آمنين على أنفسهم وأموالهم وأولادهم.